رسالة مواطن مصري الى حسني مبارك
اضم صوتي لكل اللي سألوا وعلقوا - ولكن يا سيادة الرئيس كتير منا عارف انك مظلوم ومحكوم من اول ما مسكت - ورثت معاهدة خيوط العنكبوت - وفهموك ان شعبك لازم يتحكم بالحديد والنار وانك الشغب اعدائك - وهم اللي حيحموك لحد ما تدخل الجنة انت وعيلتك الكريمة - اعمل فيهم زي مانقولك ومتخافش من اي حاجة (غيرنا طبعا)ويئسهم من عيشتهم - جوعهم وخوفهم والخمهم بتهديدات اعداء حتي ولو وهمين واقضي علي تعليمهم ودينهم - صحيح حيكرهوك ويمكن يشتموك - كل ده مش مهم - اهي حاجة تفرغ عندهم شحنة الغضب - وحتي انت شجعهم علي كدة - شجع الممثلين في افلامهم ومسرحيتهم والكتاب والبرامج الحوارية وغيرها - ما هي تمثيلية واحنا اللي عاملنها وحكمنها - متخافش كل دي فرقعات في الهواء علي الفاضي - واكدب عليهم وما يهماكش حاجة - هما عارفين انك بتكدب - وعارفين انك عارف انهم عارفين انك بتكدب - مش مشكلة انك كداب - هو فيه سياسي محترم وناجح(بمقاييس عصرنا)مش كداب - مش ممكن - ولو مشيت علي الوصفة دي حتحكم ابوهم لحد ما تموت(أو نقول احنا)وولادك وولاد ولادك وحبايبك ومعارفك وجيرانك حيحكموا ويتحكموا - المهم خليك معانا دايما - وعشان تطمئن اكتر خلي الاسماء دي حواليك دايما
اوعي تتخلي عنهم - دول اللي حيحموك ويأمنوك تماما - في النهاية
حتفضل متكتع بالسلطة والهيلمان والفلوس والصحة والصحبة انت واحفاد احفادك (نسيت اعزيك في ابن علاء - البقاء لله ويعوضكم عنه ربنا خير انشاء الله ) - طولت عليك معلهش - قالولك وصدقتهم - ما هو انت طيب زي شعبك الغلبان - بنصدق اي حاجة تتقال - شعب مسالم مهاود صبور ما بنخونش - لكن يا ريس والله والله ضحكوا عليك
انا عارف انك مظلوم - ومش مصدق ان الناس اتخنقت منك للدرجة دي
لكن للاسف هي دي الحقيقة - بس دايما فيه امل وانت عارف ان شعبك طيب ومسامح - والله العظيم طيب ومسامح - وانا متأكد انه حيسامحك
بس انت استخير ربنا وصلي ركعتين لله يعينك علي نفسك وانوي خير انك
تنصف شعبك وتنصف مصر - اللي انا عارف ومتأكد انك بتحبها بس مش مبين علشان ماتدلعش عليك - عارف انك بتحبها من جواك بجد ولو كنت اشتغلت السنين اللي فاتت دي ضدها - بعد ما فهموك ان ده في مصلحتها - مش مهم - تقدر تلحق - اطلع لشعبك واعترف له واطلب السماح وخد قرار واحد لمصلحته بجد - جايز تحتار وتسأل مصلحته بأي مقياس واي منظور - علشان ما تحتارش شوف انت كنت حتعمل زمان واعمل عكسه - ان شاء الله حيكون في صالح مصر والمصريين والعرب والمسلمين - شعبك طيب قوي يا ريس - ووالله والله رغم كل عيوبه ما يستاهل اللي حصله ولا اللي بيحصله - ومصر لسه باقية يا ريس رغم كل اللي اتباع من شركاتها ومصانعها واراضيها وكنوزها ومصالحها وصحتها وناسها ورغم كل اللي اتسرق منه - مصر لسه باقية يا ريس - مصر لسة باقية ياريس بعظمتها ومكانتها رغم كل الحقد والكره والمهانة بره وجوه ورغم الضعف والوهن والعزلة اللي اصابتها بعد اتباع سياسة البعدا الله ينتقم منهم - رغم كل ده برضه مصر لسه مصر بعظمتها بجنودها وشعبها - حتي اللي خانها ووافقك علي مواد الدستور المستحدثة والمشبوها لمد رئاستك وخانوا يا عيني اللي انتخبوهم وامنوهم (علي فكرة دول مش بيحبوك - دول بيحبوا المصلحة اللي جاية من وراك - ولو كان منهم نسبة ضئيلة طاوعوك للخوف وهم معزورين) - دول برضه من الشغب والشعب حيسامحهم - المهم يا ريس متخافش واعمل الصح - ولو عملت كده - اراهنك انك بعد كدة مش حتحتاج تقبل ضيوفك او تعمل اجتماعتك في شرم الشيخ تحت مظلة حماية اللي ما يتساموش -حتعملها في ميدان التحرير قدام ومع الناس كلها- عارف ليه - لان الشعب كله حيحميك انت وكل اللي معاك بأخر قطرة دم في عروقهم - وانا اولهم - يالله يا ريس اتوكل علي الله واعملها - الامل في الله علي
طول موجود - قول يا رب